لا تبكيــــن

موضوع: لا تبكيــــن الثلاثاء أغسطس 12, 2008 7:37 pm

لاتبجين غيمه إنتِ توجينَ
إو على آخر جرح بالروح بجفوفج تحنين
تجيبين الليالي إلما تجي إو كـَمره تجين
نهر يشبكـَ نهر ونهودج عطشها إسنين
يلين الحزن.. بجفوفي وخصرها إيلين
النهر دافي إو حزين الضحك كـَمره إو بساتين
صدرج مهره مذعوره توّج الروح بالجفين
تصهل إبليل إو ترد هاله خضره إمن الحنين
صحراوي هذا العطش يحلم بالنهر جفين
يرف لون الخصر كـَبل اللمس: جنحين
خـَطف ياخذ حنين الروح عليج إمن العطش نهرين
إصابيعج اغاني الماي تتلون غنج واسرار
كـَميره إمن الفرح واسرار
إصابيعج ورد من نار
تجيب الكـَمره للظلمه إو تفل اسرار باسرار
إصابيعج برد من نار
إصابيعج ليالي إطوال
إصابيعج توّج كـَبل اللمس ذكرى إو جمر تذكار
أحلم بطولج نهر توّج خضره البساتين
مهر ياخذ إصابيعي إبصهيل إو يشعل الصوبين
علميني المشي عالماي علميني الركـَص بالنار
أسهر إلأبعد صبح هيبه إو كـَمر واسرار
ويهيم الحنين إعليك هاله إمن الحزن واسرار
علميني أجيس الحجر ينطوي بجفي إو يلين
علميني .. علميني آخ أدوسن عالجرح صوبين
درويش الاغاني ما فرح طوله الحزين
يتلكـَه النهر جرفين إو يفيض إمن العطش لو رفت العين
إو ماتدرين.........
عزيز إيعاند الغربه إو يرد إمن الفرح كلّش حزين
يهيم إخيول مذعوره ماتعرف تريد إلوين..؟
نزيف إعيوني ياخذني.. العراق إمنين....؟
يجي منك جرح. أفرح .. يجن جرحين
صحراوي هذا الحلم يمتد للابد ماشين
ماأدري إنت ِ من ياصبح مهره تجين
النفـَِسْ ورد البساتين إخذيني... إخذيني
أصد الخوف من يعرض تجين إو ما تجين
الجمر يخضر من تجين
الكـَمر يكبر من تجين
يالون البرد بجفوج الحلوين
تزيد إمن الحزن كلْما فرحها إيزيد
ياخفكـَ الحمام إو لهفة التنهيد
مذعور الصدر دوّخ إصابيعي إو حّير النهدين
سرب إمن الحمام ايطير مدري الوين..؟
كل عمري يمتد نهر يفيض ايضيّع الجرفين
أموت إمن العطش لمن تجين إو ماتجين
أمر برد الصبح بجفوفج إتحلمين:
شمس تاخذ إصابيعي نهار الغبشه الماشين
إنتَ منين وآنه إمنين...؟
جرح يجمع عذابين تحزن اشوفك
كـَمر يغركـَ بالنزف ليوين
حـِزين الكـَمر بجفوفي ليالي إينوح
ياصوت إليهيم اشراع للروح
يا.. سر... الجيب.. الروح.. للروح
ياكـَلبي.. إلعليك... إبذله مذبوح
إشعلي الماضي كله ابليل
إوحيل إبجي عليّه شما بالنـَفـِس من حيل
إخذيني ظلام إو خوف
لميني نزف ما شوف
داويني كـَمره الوطن يهيم إعيون لَشـّوف
إخذيني نهر أزركـَ يفيض إمن الفرح ويشوف
يلمض الليل إو يفز : خيل إو شمس وسيوف
حـِزين النهر يتلمس بيديج إطيوف
يوّج برد الاصابع من حنين الخوف
ويهيم غبشه الصدر لجفوفي كلي إنشوف
مذعور الشـَعر بالريح مهره إبلا رسن وطيوف
إخذيني خذاني الخوف
إخذيني نزف شاعر يطيح إعله الورق ملهوب
إخذيني قصيدة هور تدوي إبكل حرف مشحوف
إخذيني... إخذيني كـَمره إو حصن وسيوف
أريد إلما تريده الناس وأحلم بالظلام إيشوف
أهيم إمن الحزن وأوكـَــف إبطولي اشراع
ولك ماي النهر كل عمره بس ... إوداع
الوطن بين الاصابع ما يمس الكـَـاع
أفرح يموت الفرح أحزن توّج اسرار
أسافر بالدمع مرتين
. مره حنين الصدر ياخذني مدري الوين..؟
. ومره الاصابع توّج روحي اغينه ابجفين وين..
وين إتغني بجفوفك تريد إلوين..؟
يهيم الصوت بالكـَـمره عـَلَيْ : مهرين
ياخذني الصهيل إو يرد خوف إيفزز النهدين
أغانيّك حنين إجفوف بالنهدين
حمام إيطير بالكـَـمره لوين....؟
أطير ابلا جنح جنحين...!
أغانيـّك نهر تاخذ حنيني انهار
أغانيـّك سفن من نار
فرح ورد القميص إبجية الخطار
أغانيـّك جمر بيت الفقير إو عزة الأفكار
أغانيـّك تهز ليل المدينه بكـَـمرة الاسرار
أغانيـّك فرح درويش يلعب بالجمر والنار
أغانيـّك تمس جرح الشهيد بدمعة الثوار
وين إتغني بجفوفك تريد ... إلوين....؟
يهيم الصوت بالكـَمره عَلَيْ مهرين
أغانيـّك نزيف إعيون تجيب الكل صبح شمسين
دلّيني العراق إمنين.....؟

هالله هالله والله صح لسانك يا خوي وربي لايحرمنا من مشاهدة ابداعاتك تقبل مروري اخوك علاوي

اولا *مرحبـــــــــــــــــــــــا بك اسير الروح فيك في المنتدى 000

ثانيا *مووووووووضوع حلو وجميل 0000

تحياتي روعه السعوديه 00 flower

شكرا الكم على هاذا المرور الجميل والرقيق اســــــير الروح

هلا والله بالغالي اسير الاول نرحب بك احلى ترحيب ونتشرف ان تكون احد اعضاء اسرتنا الصغيرة
ونتمنا كل التوفيق معنا . موضوع رائع جدا بروعتك يا الغلا ابدعت بكل انواع الابداع .
نحن بانتظار كل جديد لك تحياتي .

اسير الروح
تقبل مروري متواضع
واسمحني اقولك
من اجمل ما قرات
بانتظار جديدك بفارغه الصبر
شكرا

موضوع: رد: لا تبكيــــن السبت مارس 07, 2009 12:57 pm

تسلم ايدك اخي اسير الروح كلمات جميله ومغلفه بأحساس اجمل
تقبل مروري وننتظر جديدك
تحياتي لكم
ملتقــــــــــــــــــى الاحزان

اخى اسير الروح كلمات روعه من انسان
تقبل مرورى
اخوك شريف